بورم یزد و ته وِ یزدی بیارم           ته وسّه مخمل عالی بیارم

کاری نکن ته سر وسنی بیارم           ته ململ چش ره عصری بیارم

----------------------------------------------------

ته بوردن بوردن آ مه هارش هارش           قشنگ کیجا جان دنبال ره هارش

کهو آسمون ره کمبه سفارش           ته بوری بین راه دئیره وارش

----------------------------------------------------

سر تپه نماز کند کیجا جان           کمر ره دلا راس کند کیجا جان

خدا جه التماس کند کیجا جان           مه ره شِه ور دراز کند کیجاجان

----------------------------------------------------

اونجه ته اسّایی مه روبروئه           ته تن کت و شلوار رنگ کهوئه

اگر دونم این عاشقی دروئه           یک مثقال تریاک این جان گروهه

----------------------------------------------------

دیاری دیاری نزن اشاره           دشمنون بیتنه دور اماره

الهی دشمن دل بووئه پاره           من آ ته عاشقی ندارنه چاره

----------------------------------------------------

اگر مه ره خوانی شب تار برو           ندارنی وسیله با قطار برو

اگر دشمن بهیته سر راه ره           هاکن میون برو آب دریاره

----------------------------------------------------

برو تا گندم یک دانه بویم           برو تا او رودخانه بویم

همین که شو بیّه دستی به گردن           که روز روشن بیه بیگانه بویم

----------------------------------------------------

سرم درد بهیته تا حد گردن           اجل برسیه ونه بمردن

اجل ماره نکوش ما نوجوانیم           گل نشکفته ي مازندرانیم

----------------------------------------------------

ساری سور دار چند چلّه دارنه           دِتا بلبل ونه سر ناله دارنه

یکی بلبل که داغ وچه دارنه           یکی بلبل عاشق گم کرده دارنه

----------------------------------------------------

بلند بالخانه بلند پرده           من و تو هنیشیم هرده به هرده

انده هنیشیم آ آفتاب دگرده           امه کهنه دشمن دل بترکه

----------------------------------------------------

بنال بلبل بنال تا من بنالم           ته درد گل من درد یارم

ته درد گل بنال شش ماه و شش روز           من درد یار بنالم هر شب و روز

----------------------------------------------------

اِسپه پیرهن نکن ته تن دیاره           یواش یواش برو مه مار بیداره

یواش یواش برو انجیل سایه           نا مه مار بشناسه نا مه همسایه

----------------------------------------------------

هراز او بموهه پل ره بورده           من و مه دلبر دل ره بورده

رفقون جمع بوین پل ره بسازین           من و مه دلبر دل ره بسازین

----------------------------------------------------

بلندِ قد دارنه بلندِ بازو           بلند دَروِن سر گیرنه وضو

من آ ته هنیشیم زانو به زانو           ته دل درد دره آ مه دل آرزو

----------------------------------------------------

کیجای سره پیش دار دارنه هلی           دِتا طِلا درِنه گِنه امیری

الهی طلا آ نیره ته گلی           مگر ته دل دره درد عاشقی

----------------------------------------------------

شبای زمستون دارمه انتظار           نیشتمه نال سر ندارمه قرار

ته ره قسم دمبه جان ته برار           مه دل نشکن آ برو مه کنار

----------------------------------------------------

فلک آخر مه ره غریب هاکرده           از دیدن ته بی نصیب هاکرده

مه ره دور از منه طبیب هاکرده           کهنه دشمن ره مه رقیب هاکرده

----------------------------------------------------

نیشتبیِمه شه سِره من زومه ناله           بِلبل خَوِر بیاده نوبِهاره

درد عاشقی دارمه نوونه چاره           مست بلبل ته ناله بلاره

----------------------------------------------------

شب وروز ته وِسّه من زمّه ناله           دل من تنگ بیّه نوونه پاره

دِشمِنون شماره هاکنم چه کار           نینگنین جدایی من و منه یار

----------------------------------------------------

ته گوش گشواره آ گردن تِمِنی           کیجا بوته ریکا اَمه سِره نِنی

اِسا که من اِمبه شونی خِسِنی           معلوم بیه کیجا مه ره نخوانی

----------------------------------------------------

خدایا سر هدایی سامون هاده           خدایا درد هدایی درمون هاده

ته جه من نخواسمه مال و ثروت           جان خدا مه ره هم زبون هاده

----------------------------------------------------

چندِ من هِرسّم کَلِک کنار           چند من هاکنم ستاره شمار

شیشک و ترازی همه شونّه مار           آخر بمو مه قشنگ یار

----------------------------------------------------

پاییز بموهه وا دکته صحراره           ارباب در اِنه زارع گیرنه شه لِفاره

قربون بهووم قدرت خداره           زارع بزوهه ارباب په کِفاره

----------------------------------------------------

کیجای نالِ بِن تو دکشم تو           انده تو بخِرم نالّ بورم لو

مار گنه چچیه دتِر گنه گو           بیچاره دِتِرا چو بَخرده چو

----------------------------------------------------

مسلمونون مه ره با کارد بکوشین           مه گوشت ره بِورین دهات بروشین

مه گوشت ره بورین دهات به دهات           همه ره کم هادین مه یارره زیاد

----------------------------------------------------

عقل وِنه آدم کلّه دوو           کیجا وِنه آدم مله دوو

صِواحی نماشون راه کوچه دوو           چِش وه ره بوینه دل تازه بوو

----------------------------------------------------

کیجا جان سر ته من زن نورمه           همان قول که هدامه ته ره ورمه

همان قول هدامه دیروز نماشون           کدوم کافر ته ره کرده پشیمون

 

 

منبع: بندپی، بهشت گمشده مازندران